Burco iyo Hargaysa Noqday Meesha ugu Taageerada Badan Nabad iyo Nolol Akhriso Warbixin u Qoray Asad Adaani

Xukuumadda NN waa xukuumaddii ugu taageerada badnayd magaalooyinka Burco iyo Hargeysa marka la barbar dhigo xukuumadihii ka horeeyey sida tii Cabdilaahi Yuusuf, Shiikh Shariif, iyo Xasan Shiikh Maxamuud.

Had iyo jeer goorta la dhaliilo Farmaajo iyo xukuumadiisa dadka ugu badan ee difaaca ama u dooda xilligan Burco iyo Hargeysa ayey joogaan, kuwa ugu caansan ee xukuumadda NN shaashada saarana waa rag ka soo jeeda Burco iyo Hargeysa, bulshada ugu badan ee doodda kulul na dhex martana waa xubno ka soo jeeda Burco, Berbera iyo Hargeysa Sir iyo Caadba.

Waxaa iyaguna jira xubno badan oo iyaguna ka soo jeeda Sool iyo Sanaag oo ilaahay amarkii Hargeysa iyo Burco jooga “Somaliland” la jooga madaxdooda isla soo sawira ka shaqaysta galinka horena “Somaliland” duuliya gelinka danbena Farmaajo difaaca.

Rag badan oo kale oo dooddo kulul nagu dhexmari jireen warbaahinta kala duwan oo aad u difaaci jiray gooni isu taaga “Somaliland” hadda si hoose ayey la taliyayaal ugu yihiin madaxda sare ee NN iyagoo qarsoodi door bidaya.
Arrimahaas oo dhan anigu aad ayaan u soo dhaweynayaa waa arrin aan ku taageerayo NN, sii hoobashada fikradaha qaarkood ku yimi “اضمحلال” gaar ahaan fikirkii gooni isu taagu in uu dhalaalo sidii bac dab la saaray waa arrin ay muuqato natiijadeeda bilowga ahi.

Kol haddii dhalin joogta Burco, Hargeysa, iyo Berbera oo reer waqooyi ahi, isla markaana dalka goboladiisa kale jooga sida Muqdisho diyaar u yihiin in ay difaacaan xukuumadda NN iyo Farmaajo, waa arrin ku timi jiil dhan oo is badelay, 33 sanoba jiil cusub ayaa abuurma, waxaanu u soo joogay marxalado badan.