Deg Deg Daawo sawiro:Wefti Culus Ka Socda Beesha Caalamka Oo Baydhabo Gaadhy iyo Kulan Ay Layeeshen Shariif Xasan,

Ergeyga gaarka ah ee Midowga Afrika iyo kan Q/Midoobey u qaabilsan Soomaaliya Francisco Madeira & Nicholas Haysom ayaa maanta gaaray Magaalada Baydhabo.

Labada masuul ayaa Baydhabo kula kulmay Madaxweynaha muddo xileedkiisu dhamaaday ee Maamulka Koofur Galbeed Shariif Xasan Sheekh Aadan.

Sida wararku sheegayaan waxaa kulanka diiradda lagu saaray khilaafka dowladda Federaalka iyo dowlad Goboleedyada ka jira dalka qaarkood iyo qaabka ugu haboon ee loo xalin karo.

Sidoo kale waxyaabaha laga wada hadlay waxaa ka mid ah doorashada Madaxtinimada ee bisha soo socota ka dhaceysa magaalada Baydhabo.

Inkastoo aan la shaacin waxyaabaha ka soo baxay kulankan ayaa haddana wararka qaar waxay sheegayaan in Shariif Xasan uu wakiilada Midowga Afrika iyo Qaramada Midoobay u gudbiyey dacwad ka dhan ah dowlada federaalka oo uu ku eedeeyey iney fara gelin ku heyso doorashada hogaanka Koonfur Galbeed.

Wakiillada Qaramada Midoobey iyo Midowga Afrika ayaa todobaadkan bilaabay dhexdhexaadinta dowladda dhexe iyo dowlad Goboleedyada iyagoo horey ula soo kulmay madaxda dowlad goboleedyada Juballand & Hirshabelle.